Martın 9-da İsrail Prezidentinin son 14 ildə Türkiyəyə ilk səfəri baş tutub.
Türkiyə Prezidenti Rəcəb Tayyib Ərdoğan Ankarada səfərdə olan İsrail Prezidenti İsaak Hersoqu Beştəpə iqamətgahında rəsmi mərasimlə qarşılayıb. İ.Hersoq fəxri qaravul dəstəsinin önündən keçib.
Sonra iki ölkə prezidentlərinin təkbətək görüşü başlayıb. Danışıqlardan sonra liderlər birgə mətbuat konfransı keçiriblər. İsaak Hersoq çıxışı zamanı bildirib ki, İsraillə Türkiyə arasında əməkdaşlığın inkişafı təkcə iki ölkənin deyil, regionun xeyrinə olacaq.
“İsrail və Türkiyə əməkdaşlıq etməlidir, bu, bölgəmizə kəskin şəkildə təsir edəcək. Məqsəd ölkələrimiz və xalqlarımız arasında dostluq münasibətlərinin inkişafı üçün əsas yaratmaqdır”, – Hersoq əlavə edib.
Siyasi şərhçi Tural İsmayılov məsələ ilə bağlı Medianews.az saytına açıqlaması zamanı bildirib ki, Türkiyə və İsrail münaibətlərinin yaxşılaşması, iki ölkənin mesajlar vermələri gələcək geostrateji planlama baxımdan da müstəsna əhəmiyyətə malikdir.
“Türkiyə və İsrail münasibətləri “Mavi Mərmərə” hadisələrinə qədər kifayət qədər yaxşı vəziyyətdə olub. Eyni zamanda Türkiyə və İsrail lobbisi dünyanın bir çox ölkələrində ermənilərin uydurma soyqırım yalanlarına qarşı həmişə birgə mübarizə aparıblar. Bir nüansı da xüsusi qeyd etmək istəyirəm ki, bu gün də Xocalı həqiqətləri ilə bağlı dünyada görülən təbliğat işlərində yahudi lobbisinin kifayət qədər Azərbaycan diasporasına və xaricdəki Azərbaycan fəallarına dəstəkləri mövcuddur. Bu baxımdan düşünürəm ki, regionun önəmli dövləti kimi Türkiyə də İsraillə münasibətləri mütləq normallaşmalı idi.
Antalya Diplomatiya Formuna İstail prezidentinin dəvət alması, gəlişi, Türkiyə prezidentinin münasibətlərin yaxşılaşması barədə verdiyi mesajlar Türkiyə və İsrail münasibətlərində xüsusi yeniliklərə səbəb olacaq. Həm Türkiyə, həm də İsrail dünyanın önəmli siyasi mərkəzlərindən biri hesab olunur. Bu baxımdan Türkiyə və İsrail münasibətlərinin yaxşılaşması, iki ölkənin birgə mesajlar vermələri gələcək geostrateji planlama baxımdan da müstəsna əhəmiyyətə malikdir”.
Siyasi şərhçinin sözlərinə görə, İsrail və Türkiyə münasibətlərinin yaxınlaşması bir çox dövlətləri qıcıqlandıra bilər.
“Hansı ki, müsəlman həmrəyliyindən danışıb, kənarda Türkiyənin güclənməsindən narahat olub müxtəlif təxribatçı çağırışlara açıq və gizli formada dəstək verirlər. Türkiyə və İsrail rəhbərləri kifayət qədər ağıllı siyasi liderlər olduqları üçün üçüncü qüvvələrin iki ölkə münasibətlərini pozmaq cəhdlərinə qarşı birlikdə müqavimət göstərəcəklər. Eyni zamanda Antalya Diplomatiya Formuna bu tarixi səfər Türkiyə və İsrail münasibətlərini uzun müddətli zədələnmələrdən və qarşılıqlı anlaşılmazlıqlardan sığortalamış olacaq”.
Leyla
Medianews.az