Media
“Azərbaycan Rusiya ilə Ukrayna arasındakı münaqişəyə müstəqil xarici siyasət prizmasından yanaşır”.
Bu fikirləri siyasi şərhçi Züriyə Qarayeva Mediamews.az saytına açıqlaması zamanı bildirib.
Onun sözlərinə görə, Rusiya Azərbaycanın strateji müttəfiqidir və həmçinin Ukraynanın da dost ölkə kimi xarici siyasi əlaqələrimizdə özünəməxsus yeri var:
“Beynəlxalq gündəmin olduqca qarışıq olduğu bir vaxtda prezident İlham Əliyevin Ukraynaya səfəri bunun bariz nümunəsidir. Bakı Rusiya və Qərblə tarazlıq yaratmağa çalışır. Tarazlığı Azərbaycan onunla nümayiş etdirir ki, Rusiyaya qarşı hər hansı planda iştirak etmir. Krım platformasına Azərbaycandan nümayəndə göndərilməməsi bunun bariz nümunəsidir. Eyni şəkildə Ukraynanın ərazi bütövlüyünü tanıyır, işğal faktını qınayır. Ukrayna dövləti də Azərbaycanın bu münasibətini dəyərləndirir.
Ukrayna Prezidenti Vladimir Zelenski ölkənin milli təhlükəsizlik üzrə yeni strategiyasında Azərbaycanı da Ukraynanın strateji tərəfdaşı olaraq göstərib. Son proseslərdə Ukrayna bizə Gürcüstandan daha çox dəstək verdi”.
Siyasi şərhçinin sözlərinə görə, burada diqqətçəkən digər məqam Azərbaycanın tərəflər arasında vasitəçilik rolunu oynama ehtimalıdır:
“Bir müddət sonra Ərdoğanın da Kiyevə rəsmi səfəri fonunda deyə bilərik ki, Bakı və Ankara birlikdə bu missiyanı uğurla həyata keçirə bilərlər. Yaxın gələcəkdə Putin və Zelenski arasında Bakı və Ankaranın moderatorluğu ilə görüşün keçirilmə ehtimalı da qüvvədədir və bütün gedişlər Cənubi Qafqazda Azərbaycanın strateji əhəmiyyətinin növbəti təzahürü olacaq. Bu baxımdan da düşünürəm ki, ölkələr arasında gərginlik eskalasiya həddinə çatarsa, Azərbaycan tərəf tutmaqdan ziyadə, regionun söz sahibinə çevrilən dövləti olaraq, problemin sülh çərçivəsində həlli üçün müəyyən addımlar ata bilər”.
Leyla
Medianews.az
