Media
ABŞ ilə Rusiya arasında Ukrayna fonunda davam edən böhran hər iki tərəfin maraqları kontekstində davam edir. Rusiyanın ABŞ-a verdiyi təkliflərə, Vaşinqton yazılı və mənfi cavab verib.
Siyasi şərhçi Məhəmməd Əsədullazadə Medianews.az-a açıqlama verən zaman bildirib ki, ictimaiyyətə cavab açıqlanmasa da Rusiyadan verilən cavablar onu göstərir ki, Moskva hərəkətə keçəcək.
“Rusiya, Ukrayna ətrafına və Qara dənizə cəmləşdirdiyi qoşunları Qərbə qarşı əzələ nümayiş etdirsə də nə taktiki, nə də strateji baxımdan hədəflərinə çatmayacaq. Baş verən proseslər fonunda ABŞ – ın əsas planlarından biri Ukraynanın Donbasa hücum etməsi ilə Rusiyaya qarşı sanksiyalar tətbiq etmək və xalqın Putinə qarşı potensial etirazının formalaşmasına nail olmaqdır. Bununla da Rusiyanı daxili problemlərə sövq etməkdir. Məhz Moskva daxili problemi xarici düşmənlə əvəz etmək üçün Ukrayna ilə Donbasda münaqişəyə getməsi mümkündür. Belə olan təqdirdə Rusiya yalnız lokal döyüşlərlə kifayətlənəcək. Ukraynanın geniş ərazilərini işğal etmək Putinin hakimiyyətinin iflası deməkdir”.
Siyasi şərhçinin sözlərinə görə, ümumiyyətlə, Rusiya tərəfi Şərqi Avropanı və post-sovet məkanını öz təsir dairəsinə almaq üçün yazılı təminat istəyir:
“Vaşinqton post-sovet məkanı ilə bağlı Çinə qarşı mövqeyini gücləndirmək üçün güzəştə gedə bilər. Amma, Rusiya təkcə bununla kifayətlənmək istəmir.
ABŞ və Rusiya arasında mövcud siyasi böhran Cənubi Qafqaza da təsir edəcək. Azərbaycanın Rusiya ilə normal əlaqələrinə baxmayaraq Kremlin Azərbaycana təzyiqlər etməsi mümkündür. Türkiyə faktoru bu təzyiqləri neytrallaşdıracaq.
SSRİ dağıldıqdan sonra bir qütblü siyasi nizam formalaşıb. Rusiya bununla barışmır. Hazırda yeni dünya nizamı formalaşır. Rusiya konkret öz təsir zonasına malik olmağa çalışır. ABŞ və müttəfiqləri Rusiyanın bu siyasətinə qarşı adekvat addımlar atır. Əgər, Rusiyaya imkan tanınsa, qonşu ölkələr təhlükəsizlik problemləri ilə üz-üzə qala bilər”.
Leyla
Medianews.az
