Media
Rusiyanın xarici işlər naziri Sergey Lavrov Ukraynanı işğal edəcəkləri ilə bağlı son iddialardan danışıb.
Medianews.az xəbər verir ki, Lavrov ABŞ prezidenti Co Baydenin iddiasını rədd edərək, Ukraynaya hücum edəcəkləri ilə bağlı heç vaxt açıqlama vermədiklərini bildirib.
Sergey Lavrov “Rusiya Ukrayna üçün təhdid deyil” ifadəsini də işlədib.
ABŞ prezidenti Co Bayden bu yaxınlarda keçirdiyi mətbuat konfransında Rusiyanın Ukraynaya girəcəyini və işğalın Rusiya prezidenti Vladimir Putin üçün fəlakət olacağını bildirib. Hücum olacağı təqdirdə Moskvaya qarşı birliyə çağıran Bayden, “Rusiya Ukraynanı işğal edərsə, bunun əvəzini qısa, orta və uzun müddətdə dərhal ödəyəcək” – deyə açıqlama vermişdi.
Rusiyanın xarici işlər naziri Sergey Lavrov Rusiyanın Ukraynaya qarşı hərbi əməliyyat keçirməsinin qarşısını almaq üçün ABŞ dövlət katibi Antoni Blinkenin sammitində iştirak edib. İsveçrənin Cenevrə şəhərində keçirilən görüşdə Rusiyanın ABŞ və NATO-ya təqdim etdiyi təhlükəsizlik zəmanəti sazişi layihəsi, tərəflər arasında diplomatik missiyaların fəaliyyəti, kibertəhlükəsizlik və strateji sabitlik kimi məsələlər müzakirə edilib.
Rusiya xarici işlər naziri Sergey Lavrov sammitdə ABŞ prezidenti Co Baydenin Rusiyanın Ukraynanı işğal edəcəyi ilə bağlı iddialarına cavab olaraq Ukraynaya hücum edəcəkləri ilə bağlı heç vaxt açıqlama vermədiklərini bildirib. “Rusiya Ukrayna üçün təhlükə deyil”, – deyə Lavrov deyib.
Rusiya xarici işlər naziri həmçinin qeyd edib ki, Ukraynaya silah və Qərbdən hərbi ekspertlərinin göndərilməsindən narahatdırlar.
Lavrov həmçinin bildirib ki, NATO Rusiyaya qarşı fəaliyyət göstərdiyi üçün alyansın şərqə doğru genişlənməsinə qarşıdırlar: “Bu blok (NATO) SSRİ-yə qarşı yaradılıb, indi Rusiyaya qarşı fəaliyyət göstərir” deyən Rusiya XİN başçısı vurğulayıb ki, NATO-nun şərqə doğru genişlənməsini dayandırması Rusiya üçün “geri çəkilməyəcək fundamental məsələdir”.
Turan Oruc
Medianews.az
