Türkiyədə əri tərəfindən işgəncələrə məruz qalan gənc qadın beyin qanaması keçirib.

Medianews.az xəbər verir ki, hadisə Türkiyənin Adana şəhərində baş verib.

26 yaşlı kişi 7 aylıq hamilə qadının telefonuna mesaj gəldiyi üçün uşağının gözü qarşısında onu kəndirlə bağlayaraq 4 gün işgəncə verib. Reanimasiya şöbəsinə yerləşdirilən qadının bıçaqla 5 yerindən yaralandığı da öyrənilib.

İddiaya görə, Tebarek Arbeş (20 yaş) 15 yaşında Məhəmməd Rza əl-Mahmud (26 yaş) ilə evlənib. Cütlüyün bu evlilikdən 3 yaşlı uşağı var . Lakin ər evləndikdən sonra arvadının mobil telefonunu götürüb və yalnız ailəsi ilə danışan zaman verməyə başlayıb.

Mahmud qısqanclıq zəminində arvadını davamlı döyməyə başlayıb. Yanvarın 9-da Tebarak ailəsi ilə danışmaq üçün mobil telefonunu götürdükdən sonra telefona mesaj gəlib. Mesaja görə arvadının onu aldatdığından şübhələnən ər, kəndirlə bağladığı 7 aylıq hamilə arvadını 3 yaşlı uşağının gözü qarşısında döyərək bıçaqla xəsarət yetirib. Bundan əlavə, Mahmud qadının bədənində siqaret söndürüb.

Günlərlə həyat yoldaşına işgəncə verən Mahmud yanvarın 13-də səhər saatlarında yenidən mübahisə etdiyi hamilə arvadını döyüb. Üzü qan içində olan və tanınmaz hala gələn həyat yoldaşının huşunu itirdiyini görən Mahmud 112 Təcili Zəng Mərkəzinə zən edərək kömək istəyib. Hadisə yerinə gələn tibb işçiləri ağır yaralı qadını təcili yardım maşını ilə Adana Şəhər xəstəxanasına çatdırıblar. Qadının zərbədən zədə aldığı, bədəninin müxtəlif nahiyələrində döyülmə, bıçaq izləri və yanıq izləri olduğu öyrənilib. Bundan başqa, qadının bədənindəki yaraların 5 gün əvvələ aid olduğu, çapıqların qabıqlı olduğu müəyyən edilib.

Həyat yoldaşı ilə xəstəxanaya gələn Mahmud Adana Polisi tərəfindən nəzarət altına alınıb. Mahmud ifadəsində həyat yoldaşının onu aldatdığını düşündüyünü iddia edib. Daha sonra ədliyyəyə sövq edilən Mahmud gətirildiyi məhkəmə zalında həbs edilib. Xəstəxanada müalicə alan qadının beyin qanaması olduğu, onun və körpəsinin həyatının hələ də təhlükədə olduğu öyrənilib. Onun 3 yaşlı övladının yaxınları tərəfindən aparıldığı müəyyən edilib.

Turan Oruc
Medianews.az