“Dünən Kəlbəcər rayonundakı Xudavəng monastırını ziyarətə gedərkən gözləmədiyimiz halda erməni keşişlərlə qarşılaşdıq”.

Bunu Trend-ə açıqlamasında Xudavəng monastırının vaizi Rafiq Danakari deyib.

O bildirib ki, monastırda olan erməni keşişlər onların ziyarətinə mane olmaq istəsələr də, buna nail ola bilməyiblər:

“Müəyyən müddət onlar bizim ziyarətimizə mane olmaq istədilər. Monastırda çəkiliş aparmağa qadağa qoymaq istəyirdilər. Biz onları başa saldıq ki, monastır ermənilərə aid deyil, biz udinlərindir.

Biz onlara sübut etdik ki, monastırı onlar 1993-cü ildə zəbt ediblər. Faktlar göstərdik ki, onlar monastırda, kilsələrdəki bütün əşyaları məhv ediblər. Dekabrın 4-ü, həmçinin xristianların bayramıdır.

Biz ona görə getmişdik ki, monastırda şam yandıraq, ziyarət edək. Erməni keşişlərin maneə törətməsinə baxmayaraq, biz ziyarətimizi elədik, şamlar yandırdıq və monastırda çəkilişlər də etdik”.

Vaiz bildirib ki, səfər zamanı onlar monastırda erməni keşişlərin olmasına da etiraz edib və bunu Rusiya sülhməramlılarına deyiblər:

“Biz etiraz etdik ki, Azərbaycan ərazisində erməni keşişlərin nə işi var? Sülhməramlılar isə onların müvəqqəti olaraq burada qaldıqlarını bildirdilər”.

R.Danakari deyib ki, hazırda Azərbaycanda 400-ə yaxın Alban kilsəsi var və onların hamısını ziyarət edəcəklər:

“Bizim işğaldan azad edilən ərazilərimizdə də kilsələr var. 300-dən çox kilsə Qarabağ bölgəsindədir. Onların hər birini ziyarət edəcəyik. Ermənilər işğal etdikləri ərazilərimizdə olan kilsə və monastırlardakı bütün tarixi əşyaları və ədəbiyyatı məhv ediblər, Alban kilsələrinə, monastırlara erməni xaçı quraşdırıblar”.