Media
“Karantində günlərimiz hamı kimi monoton keçir. Qeyri-adi heç nə yoxdur. Vaxtımın əsas hissəsini övladlarımla keçirirəm. Ev işləri ilə məşğul oluram. Uşaqlarıma dərsləri ilə məşğul olmalarına yardım edirəm. Bundan başqa, onlarla zehni inkişaf etdirən oyunlar oynayıram (domino, şahmat)”.
Bu sözləri Oxu.Az-ın əməkdaşı ilə söhbətində 35 yaşlı məşhur aktrisa Sevinc Əliyeva deyib.
Cazibədar xanım sənətçi karantində uşaqları ilə keçirdiyi günlər haqqında danışıb, bundan ləzzət aldığını dilə gətirib:
“İşlərim çox olduğundan həm fiziki, həm də mənəvi cəhətdən çox yorulmuşdum. Mənim üçün karantin göydəndüşmə oldu. Düzdür, fiziki cəhətdən dincələ bilməsəm də, mənəvi cəhətdən yaxşıca istirahət edə bildim. Uşaqlarıma zaman ayıra bildiyim üçün çox sevinirəm və bundan ləzzət alıram.
Hava gözəldir. Nəinki uşaqlar, elə mən özüm küçəyə çıxıb, gəzmək istəyirəm. Amma bu, çox təhlükəlidir. Bu səbəbdən havamızı eyvandan alırıq. Vaxtımın çox hissəsini eyvanda uşaqlarla keçirirəm. Həm də uşaqların daim qapalı şəraitdə qalması heç yaxşı bir şey deyil. Yeganə çıxış yolu eyvandır”.
Bir çox həmkarlarından fərqli olaraq, S.Əliyeva karantində idmanla məşğul olmasa da, çəki ataraq, arıqladığını bildirib:
“İdmanla nə adi günlərdə, nə də karantində məşğul olmuram. Deyim ki, səhər tezdən oyanıb, idman edirəm, yalan olar. Amma qızım Fatimə baletə getdiyindən, məşğul olanda mən də onunla bərabər idman hərəkətləri edirəm. Karantində hamı biş-düşlə məşğul olduğundan, kökəlib. Amma məndə tərsinədir. İstəmədən çəki atıb, arıqlamışam. Yəqin ki, bu da sağlam qidalanmağımla əlaqəlidir”.
Qeyd edək ki, aktrisa Sevinc Əliyeva 2007-2016-cı illərdə məşhur rejissor Fuad Əlişovla ailəli olub və Əlişova soyadını daşıyıb. Bu evlilikdən onların üç övladı var.
