İranda etiraz aksiyalarında ölənlərin sayı 10 nəfərə çatıb.
APA-nın məlumatına görə, bu barədə İran Dövlət Televiziyası məlumat yayıb.
Məlumatda aksiyaçıların hansı şəraitdə öldüyü açıqlanmayıb.
“France-Presse” agentliyinin verdiyi məlumata görə, bazar günü Xuzistan əyalətinin İze şəhərində aksiyaçılara atəş açılıb.
Yerli administrasiyadan “France-Presse” agentliyinə bildirilib ki, aksiyaçılara hüquq-mühafizə orqanlarının, yaxud digər aksiya iştirakçılarının atəş açdığı məlum deyil.
Qeyd edək ki, dekabrın 28-də İranın Məşhəd, Kirmanşah, Həmədan, Qum, İsfahan, Rəşt və digər şəhərlərində etiraz aksiyaları başlayıb. Səbəb ölkədə qiymət artımı olsa da, siyasi şüarlar da səslənib. Prezident Həsən Ruhaninin daxili siyasətinə, eləcə də İranın Yaxın Şərq siyasətinə etiraz bildirilib. Dekabrın 29-da paytaxt Tehranda və Təbrizdə də etiraz aksiyaları başlayıb. Şənbə günü Lurestanda etiraz aksiyalarında toqquşmalar zamanı iki nəfər ölüb.