8c1431fd12d4d90e8b4d6766c1721840

Bu il Azərbaycanda parlament seçkiləri keçiriləcək. Artıq bir çox tanınmış simalar seçkilərdə namizədliyini irəli sürəcəklərini bəyan ediblər. Bəs şou-biznes əhli necə, seçkilərə qatılmaq istərdimi? Lent.az bu sualla şou əhlinə müraciət edib. Sual bir olsa da, cavablar müxtəlifdir.

Əməkdar artist Tünzalə Ağayeva:

“Bu mövzu ilə bağlı mənə dəfələrlə sual veriblər. Amma yenə də həmin fikrimdə qalıram. Deputatlığa namizədliyimi verməyi düşünmürəm. Daha çox sosial-aktiv olmaq istəyirəm, nəinki siyasətə qatılmaq. İndiki vaxtda deputat olmaqla bağlı qətiyyən fikirləşmirəm. Gələcəkdə isə nəyin baş verəcəyini bilmirəm. Bəlkə beş ildən, bəlkə 10 ildən sonra, özümü cəmiyyətə deputat kimi xeyirli hiss etsəm, namizədliyimi də verəcəyəm”.

Aparıcı-bəstəkar Murad Arif:

“Belə bir məqsədim yoxdur. Bu gün yalnız sevdiyim işlə, musiqi ilə məşğulam. Qarşıma qoyduğum hər bir məqsədə çatmağı bacarıram. Nə vaxtsa millət vəkili olmaqla, daha faydalı olacağımı düşünsəm, bilin ki, dərhal namizədliyimi irəli sürüb, millət vəkili də olacağam. Bəlkə də 10 ilə… Çoxları şan-şöhrət, hörmət üçün bu sevdaya düşür. İndi buna hazır deyiləm”.

Xalq artisti Səməd Səmədov:

“Millət vəkili olmaq istəmirəm. Çünki bu, daha məsuliyyətli bir işdir. Müğənniliklə cəmiyyətdə öz sözümü deməyə çalışmışam. Artıq elə bir yaş dövründəyəm ki, bundan sonra başqa bir sahədə çalışmağım çətin olar. Ona görə də elə oxusam yaxşıdır”.

Əməkdar artist Elza Seyidcahan:

“Mənim millət vəkili olmaq istəyimlə bağlı olan açıqlamam müzakirələrə səbəb oldu. Bir çoxları fikrimi tənqid etsə də, məni dəstəkləyənlər də çox idi. Çox şadam ki, fikrim bu cür reaksiya, münasibət doğurub, mütləq seçkilərdə mandat üçün namizədliyimi irəli sürəcəm. Qərarımı vermişəm, fikrim qətidir”.

Prodüser Təranə Səmədova:

“Nə yalan deyim… Bu barədə düşünmüşəm. Gələcəkdə namizədliyimi irəli sürmək istəyirəm”.

Müğənni Əli Mirəliyev:

“Hər kəs bacarığı işlə məşğul olmalıdır. İndi bəzi müğənnilər var ki, orda oturub milli məclisdə yer tutublar. Məsələn, Zeynəb Xanlarova yaxşı işlər görür. Amma başqa incəsənət adamları sadəcə oturublar orda. Mən millət vəkili olsa idim, çox işlər görərdim. İlk növbədə xalqın musiqisini öz qaydasına qoyardım. Özümdən savayı Alim Qasımov, Azər Zeynalov, Teymur Əmrahı millət vəkili kimi görürəm. Çünki onlar oxumaqda öz sözlərini deyiblərsə, millət vəkili kimi də öz sözlərini deyə bilərlər”.

Əməkdar artist Nüşabə Ələsgərli:

“Heç vaxt düşünməmişəm ki, millət vəkili olaram. Olsaydım, çalışardım ki, dövlətimiz üçün xeyirli işlər görüm”.

Müğənni Niyam Salami:

“Mən hazırda yalnız bir ifaçı kimi xalqımıza xeyir verə bilərəm. Yəni ifaçılığımdan razıyam. Millət vəkili olmaq üçün özümü hazır hesab etmirəm”.

Müğənni Afaq Aslan:

“Millət vəkili olmaq çoxdankı arzumdur. Kim millət vəkili olmaq istəməz? Bu il yox, gələn seçkilərdə namizədliyimi irəli sürəcəm. Özü də məndən yaxşı millət vəkili olar”.

Müğənni Roza Zərgərli:

“Şou-biznesdən baş aça bilmirəm, siyasətdən necə baş açım? Heç zaman millət vəkili olmaq istəməmişəm. Amma incəsənət sahəsində tanınmağım bu mənə bəs edər. Millət vəkili olmaq daha məsuliyyətli bir işdir”.

Tarzən-müğənni Humay Qədimova:

“Düzdür, belə bir iddia ağlımdan keçmir. Milli Məclisdə oturmaq üçün sənətçi olmaq kifayət etmir. Orada cəmiyyətdəki məsələlər həllini tapır. Bu sahədə kifayət qədər təcrübə və bilik toplamaq lazımdı. Belə olan təqdirdə, özümü seçkilərdə sınamaq istəyərəm”.

Müğənni İradə İbrahimova:

“Milli Məclisdə təmsil olunmaq böyük məsuliyyətdir. Özümü gələcəkdə deputat kürsüsündə görmək istəyərəm. Amma bu gün sənətəyəm. Bu sahədə daha peşəkaram. Milli Məclisin üzvü olmaq məsuliyyətini daşımaq üçün bir qədər zamana ehtiyac var”.

Müğənni Ayan Babakişiyeva:

“Həyatda hər şey ola bilər. Demokratik respublikada yaşayırıq. Bəlkə mən də öz namizədliyimi irəli sürdüm. Niyə də yox?”

Əməkdar mədəniyyət işçisi Aşiq Samirə: “Taleyin işini bilmək olmaz. Hər şey qismətdir. Özümü hələ ki, deputat kimi hiss etmirəm. Bu çox məsuliyyətli bir işdir. Bu sahədə işləmək üçün çox çalışmaq lazımdır. Əgər mən 2 nəfərin problemini həll edə bilmirəmsə, cəmiyyətin işlərinə necə yardımçı ola bilərəm ki? Özüm daxil olmaqla şou-biznesdə heç kimi orda görmürəm”.

Əməkdar artist Hüsniyə Mürvətova:

“Millət vəkili olmaq çox məsuliyyətli bir addımdır. Mən özümü yox, tamaşaçılar məni millət vəkili kimi görür. Amma bu o demək deyil ki, mən indi millət vəkili olacam. Yox, bunun üçün çox mütaliə etmək lazımdır”.