Media
Prosedura görə, xaricdə yaşayan şəxsin Rusiya vətəndaşlığından çıxması daha asandır
“Milli Şuranın vahid namizədi kimi Rüstəm İbrahimbəyova “stavka” edənlər və onun Azərbaycana gələcəyinə inananlar yanılır. Şəxsən məndə belə fikir formalaşıb ki, İbrahimbəyov nə Azərbaycana gəlmək, nə də prezident seçkisində iştirak etmək istəyir”.
Publika.Az xəbər verir ki, bu barədə tanınmış vəkili Adil İsmayılov Rüstəm İbrahimbəyovun Bakıya gəlməməsi və buna səbəb kimi ikilivətəndaşlıq problemini əsas gətirməsinə münasibət bildirərkən deyib. Vəkil hesab edir ki, Rüstəm İbrahimbəyovun Rusiya vətəndaşlığı səbəbdən çox bəhanədir. Onun sözlərinə görə, Rusiya vətəndaşlığı ilə bağlı İbrahimbəyovun dediklərini təhlil etmək belə nəticəyə gəlməyə əsas verir.
“Mən hüquqşünas kimi vətəndaşlıq məsələləri ilə əlaqədar Rusiya qanunvericiliyini araşdırdım və Rusiyadan olan tanış vəkillərlə danışdım. Vətəndaşlıqdan çıxmaq üçün şəxsin Rusiyada olmasına heç bir ehtiyac yoxdur. İbrahimbəyovun Rusiyada vergi və digər orqanlarla hər hansı problemi olsaydı, o, Rusiya ərazisində sərbəst hərəkət edə və oranı sərbəst tərk edə bilməzdi”.
Rəsmi Moskva da Rüstəm İbrahimbəyovun vətəndaşlıqdan imtina müraciətinə reaksiya verdi. “Rusiya Federasiyasının vətəndaşlığından çıxma proseduru müraciət edən şəxsin yaşayış yerindən asılıdır”. Bunu Rüstəm İbrahimbəyovun Rusiya Federasiyası vətəndaşlığından çıxmaq barədə müraciəti ilə bağlı APA-nın Moskva müxbirinə açıqlama verən Rusiya prezidentinin mətbuat xidmətinin rəhbəri Dmitri Peskov bildirib.
D. Peskovun sözlərinə görə, vətəndaşlıqdan çıxmaq istəyən şəxs Rusiya Federasiyasında yaşayırsa, vətəndaşlıqdan çıxma proseduru yazılı ərizə əsasında ümumi qaydada həyata keçirilir: “Şəxsin ərizəsi, eləcə də tələb olunan sənədlər paketi Rusiya Federal Miqrasiya Xidmətində razılaşdırılır və vətəndaşlıq məsələləri üzrə Rusiya Federasiyasının Prezidenti yanında Komissiyaya təqdim edilir. Məsələ müsbət həll olunduqda bu barədə Rusiya prezidenti tərəfindən müvafiq fərman imzalanır. Ərizəyə 1 il ərzində baxılır”.
D. Peskov şəxs xarici dövlətin ərazisində yaşadığı halda, vətəndaşlıqdan çıxma prosedurunun sadələşdirilmiş qaydada aparıldığını söyləyib: “Yazılı ərizə tələb olunan sənədlərlə birlikdə Rusiya Federasiyasının xaricdəki diplomatik və ya konsulluq nümayəndəliklərinə təqdim olunur. Diplomatik və ya konsulluq nümayəndəliklərinə təqdim olunan ərizənin baxılma müddəti isə təxminən 6 ay təşkil edir. Vətəndaşlıqdan çıxma proseduru şəxsin Rusiya Federasiyası vətəndaşlığından çıxması haqqında arayışı diplomatik və ya konsullu nümayəndəliklərindən almasından sonra bitmiş hesab edilir.
Əgər vətəndaşın Rusiya Federasiyası qarşısında federal qanunla yerinə yetirilməmiş öhdəliyi varsa, Rusiya Federasiyasının müvafiq səlahiyyətli orqanları tərəfindən hər hansı cinayət işində adı hallanırsa və ya məhkəmənin onun barəsində ittihamedici hökmü qüvvəyə minibsə, eləcə də vətəndaşın başqa vətəndaşlığı və onu almağa zəmanəti yoxdursa, bu halda vətəndaşlıqdan çıxmağa icazə verilmir”.
Qeyd edək ki, Rüstəm İbrahimbəyov Azərbaycana gəlməməsinin səbəbini belə açıqlamışdı: “Rusiya vətəndaşlığından məhrum edilməyim mənim özümün də bu prosesdə fəal iştirakımı tələb edir. Ona görə də Bakıya yalnız bu məsələ həll ediləndən sonra qayıdacağam. Hələliksə bu məsələ mənim Azərbaycandan kənarda olmağımı tələb edir. Dəfələrlə demişəm ki, bütün bu prosedur məsələlərin həlli mənim iştirakım olmadan mümkün deyil”.
publika.az
