Azərbaycanın Rusiyadakı səfiri Polad Bülbüloğlu prezident İlham Əliyevin iyulun 31-də axşam Moskvaya səfərə getməsi ilə bağlı yayılan məlumatları təkzib edib. Səfir P.Bülbüloğlu Publika.Az-a açıqlamasında deyib ki, bu barədə yayılan məlumatlar yalandır: “Əgər belə səfər olsaydı, hər halda səfir kimi mənim də xəbərim olardı. Bu məlumatlar doğru deyil”. Polad Bülbüloğlu hazırda məzuniyyətdə olduğunu da söyləyib.
Xatırladaq ki, “Turan” agentliyinin Moskvadakı mənbələrə istinadən yaydığı məlumata görə, Azərbaycan prezidenti İlham Əliyev iyulun 31-də axşam Moskvaya səfərə gedib. Mənbə bildirir ki, İlham Əliyev Moskvanın tam mərkəzində, Kremldən iki addım məsafədə yerləşən dəbdəbəli Lotte Hotel-də yerləşib. Həmçinin, İlham Əliyevin artıq baş nazir Dmitri Medvedevlə qeyri-rəsmi görüşü olduğu bildirilir.
musavat.com