Media
“Dünəndən bu günə qədər İmranın müalicəsində hər hansı yenilik edilməyib. Səfirliyin əməkdaşları daim xəstəxanada olur, lakin həkimlər yeni heç bir məlumat verməyiblər. Uşağın ümumi vəziyyəti stabildir, dəyişiklik yoxdur”.
Bu sözləri İmran Cəfərzadənin son durumu ilə bağlı Azərbaycanın Almaniyadakı səfirliyinin mətbuat attaşesi Vüqar Qafarov deyib.
Avqustun 3-nə planlaşdırılan müayinənin vaxtının dəyişməyinə gəldikdə isə, V.Qafarov bu tarixin dəyişə biləcəyini dedi:
“Mütləq deyil ki, deyilən gün olsun, ola bilər ki, bir gün əvvəl, yaxud sonra olsun. Konsilium keçiriləndə biz də, valideynləri də iştirak edəcəyik. Yeni bir məlumat olarsa, mətbuata müvafiq açıqlama veriləcək”.
Xatırladaq ki, iyulun 21-də Xaçmaz rayonunda yerləşən “Nabran Holiday Village” akvaparkının hovuzunun nasos sistemi İmran Cəfərzadəyə ağır xəsarət yetirib. Trubanın ağzında qoruyucu barmaqlıq olmadığından uşaq sağ ayağının dizdən aşağı hissəsi və sol ayağının dabanını itirib. Prezident İlham Əliyev İmranın müalicəsinin dövlət hesabına təmin edilməsi ilə bağlı göstəriş verib. İki yaşlı İ.Cəfərzadə iyulun 25-dən Berlinin ən yaxşı klinikalarından biri “Charite” də əməliyyat və müalicə olunması üçün Almaniyaya yola salınıb.
publika.az
