Gürcüstan Müdafiə Nazirliyi Krtsanisi təlim mərkəzində baş vermiş insidentdən sonra klinikaya yerləşdirilən azərbaycanlı çağırışçı Elcan Əfəndiyevin işi ilə bağlı bəyanat yayıb.
“Sputnik Georgia”nın məlumatına görə, nazirlik E. Əfəndiyevin əsgərlər tərəfindən döyüldüyünə dair iddiası ilə razılaşmayaraq insidentin hazırkı mərhələdə araşdırılmasının bu iddianı təsdiq etmədiyini bəyan edib.
“Şahidlərin ilkin dindirilməsi döyülmə faktını təsdiq etmir. Bunu “Rustavi” klinikasında aparılan müayinələr, o cümlədən beyin tomoqrafiyası da sübut edir”, – deyə bəyanatda vurğulanıb.
Qeyd olunub ki, çağırışçı hərbi hospitalda da psixoloji, nevroloji müayinədən keçib və heç bir zorakılıq izlərinə rast gəlinməyib.
Xatırladaq ki, E. Əfəndiyevin valideynləri onun təlim mərkəzində bir neçə şəxs tərəfindən döyüldüyünü iddia edir.