Bu gün MSDM sədri İsa Qəmbər Almaniyaya gedib.
Müsavat Başqanı Arif Hacılı bu xəbəri təsdiqləyib. “İsa bəy bu gün Avropada yaşayan dostların xahişi ilə Almaniyaya gedib. Orada tibbi müayinələrdən keçəcək. Bir müddət bu ölkədə istirahət edəcək” – Arif Hacılı ” Basta” əməkdaşına bildirib.
Bu barədə APA agentliyi də məlumat yayıb. Məlumatda deyilir:
Müsavat Partiyasının sabiq başqanı İsa Qəmbər Almaniyaya gedib.
Müsavat Partiyası Gənclər Təşkilatının sədri Əbülfəz Sadıqbəyli APA-ya bildirib ki, İ. Qəmbər Almaniyadakı xəstəxanalardan birində müayinə ediləcək, ehtiyac yaranacağı təqdirdə isə müalicə olunacaq.
Aprelin 4-də gecə Almaniyaya yola düşən eks-başqanı oğlu Turqut Qəmbər müşayiət edir.
Qeyd edək ki, bu ilin əvvəlində Milli Strateji Düşüncə Mərkəzinin sədri, Müsavat Partiyasının sabiq sədri İsa Qəmbərin səhhətində problem yaranıb. O, Mərkəzi Klinik Xəstəxanada müalicə olunub, ürəyinə bir neçə stent yerləşdirilib.
Fevral ayının sonlarında isə o, müalicəsini davam etdirmək üçün Türkiyəyə gedib.
Ankaradakı Hacettepe Universiteti Xəstəxanasında müalicə olunan İ. Qəmbərin müalicəsi martın 14-də başa çatıb və o, Bakıya qayıdıb.