Avropa Polis Təşkilatı (Avropol) dünya miqyasında axtarışda olan cinayətkarları tapmaq üçün maraqlı bir kampaniyaya start verib.
Axar.az xəbər verir ki, Avropolun saytında elan edilən kampaniyada 21 cinayətkar üçün açıqcalar hazırlanıb və sayta daxil olanlardan açıqcaların ünvana çatması üçün yardım tələb olunub.
“Əziz cinayətkar, Belçika kartofları çox dadlıdır və bunun üçün darıxdığını bilirik. Gəl və dadına bax. Gözəl sürprizlər səni gözləyir. Görüşənədək. Belçika Federal polisi”, – Belçika polisinin hazırladığı açıqcada qeyd olunub.
“Əziz cinayətkar, ümid edirik ki, tezliklə geri qayıdacaqsan. Səndən ötrü çox darıxmışıq”, – bu sözlər isə Fransa polisinin hazırladığı açıqcadandır.
Avropolun mətbuat katibi Tine Hollevoet əsl məqsədlərinin insanların diqqətini cəlb etmək olduğunu deyib və kampaniyanın indidən müsbət nəticə verdiyini bildirib.